منه تيسير: من أول ما لمست أرض مصر والناس بتنادينى يسرا أم مالك
الفنانه الشابه منه بدر تيسير تفتح قلبها لموقع “أخبار الغد” حاورتها: انتصار أحمد
ملامحها شقيه شبهها الكثير من جمهور السوشيال ميديا بالفنانه الراحله مديحه كامل إستطاعت من خلال مشهد فى مسلسل العتاوله أن يكتب عنها الجمهور والنقاد إنها مظلومه ويجب إن يلتفت لها صناع الدراما اكثر من ذلك انها وكان مع الفنانه الشابه منه بدر تيسير هذا الحوار فى السطور التاليه
هل كنت تتوقعين هذا النجاح لمسلسل على العتاوله؟
ف الحقيقة المخرج مع شركه الإنتاج مع النجوم دي كلها لازم يبقى عمل كبير أكيد أنا مدركه إن ده عمل ضخم التوليفه كلها كلها لازم يبقى عمل جيد ده عمل ضخم وكبير بس مكنتش متخيله حب الناس واللزمات وان فيه مطاعم وعربيات بتكتب الزمات توفيق ربنا أكبر من أى توقعات وهذا شئ انا سعيدة بيه جدا
حدثينا عن المشهد الذي كان حديث السوشيال ميديا وهو موت ابنك؟
طبعا هذا من اهم وأصعب المشاهد ليا وكنت شايله همه كده كده أنا ومى كساب في كيمياء ما بينا ونقعد نفكر مع بعض في الشخصيات وبنقعد نتكلم مع بعض كتير عن يسرا وعائشة و قبل المشهد ده قعدنا نشحن نفسنا كتير ونفكر ف حاجات وعملناه من أول مرة ما ينفعش تطلع مرتين بكل التدفق و الأحاسيس وطبعا المشهد ده كان بالنسبالي لي صعب طبع كل المشاهد اللي عندى صعبه وثقيلة والمشاهد اللي بينى وبين مى واحنا ومالك في العنايه المركزه وانا بقولها انتى السبب في كل حاجه حصلت وهتحصل وأنا مش بحاسبك لوحدك ده مشهد فيه يسرا وعائشة أكثر لحظة هما بيتطهروا فيها بيتكلموا من قلبهم قوى كل واحده عاوزه ترمى الحمل على التانيه.
أوصفى لنا شعورك عن نجاحك فى دور يسرا ورد فعل جمهورك على السوشيال ميديا؟
طبعا يعني حمد ربنا وسعيده جدا وخدى بالك أنا كنت بصور لغاية 28 رمضان فى لبنان ما كنتش في مصر فكان كل رد الفعل بيجي لي من النقاد ومن السوشيال ميديا ومن صفحات الجمهور كان هو الترمومتر بتاعى السوشيال ميديا الحمد لله توفيق من ربنا وكنت سعيده جدا ومن أول ما دخلت المطار ورجلى لمست أرض مصر والناس بتنادينى يسرا أم مالك خلاص فيه لقب جديد بتطلقوا عليا في الشارع كده في التعامل بتاع بقيت ام فاهمه لقب ام فارس وام مالك طبعا كرم كبير من ربنا وتوفيق يعني في الاول وفي الاخر ربنا يعني وفقنا كلنا ووفقني واحنا والله بجد كنا تعبنا قوي وكنا مصدقين التجربه فالحمد لله اللي بيخرج القلب بيدخل القلب فالحمد لله الناس حبتنا وصدقتنا وحبتني وصدقتني لأن أنا فعلا كنت حابه قوي الشخصيه يعني متعايشه جدا الدور فالحمد لله يعني
هل تأثرتى بشخصية يسرا؟
نفسيتي تعبت وحقيقي حقيقي والله العظيم كنت ببقى مطفيه دبلانه يعني مشهد موت مالك قبلها كنت بساعتين ولا حاجه كنا بقى بنتسحر وبناكل لأننا عملناه الفجر المخرج أحمد خالد قالى مالك فيه ايه انت في حد مضايقك انت في حد مزعلك وانا قاعده باكل بقيت حتى وأنا فى الكواليس تحس ان فيه حاجه تعبانى ومضيقانى الدور أسر عليا جدا بقيت أنا مصدقاه ومتعايشه جدا بيه
هل الكواليس الأن تختلف عن ما قبل زمان كانوا النجوم بيجتمعوا أثناء الإستراحه أما الأن كل فنان فى غرفته هل كواليس العتاوله مختلف؟
بتاعه العتاوله ما فيش كل واحد في غرفته احنا كلنا مع بعض طول الوقت احنا كمان حقيقي كل اليوم بنقضيه مع بعض بناكل مع بعض سفر المسلسل كله كان سفر كان في اسكندريه الأول وبعد كده لبنان احنا طول اليوم بنقضيه مع بعض بناكل مع بعض بنشرب مع بعض بتتفرج على التليفزيون مع بعض بنتفرج على أول حلقه مع بعض بنفطر مع بعض وبنتسحر مع بعض يعنى لو فيه أغلبنا فى الأوتيل والأغلب فى التصوير بنروح التصوير عشان نتسحر مع بعض استاذ أحمد طول الوقت قابض علينا ونتفرج على رامز مع بعض وقت الفراغ بنذاكر لبعض بنفكر لبعض وأكيد مش كل الكواليس كده العمل ده عشان كلنا حابين بعض وبنعطى طاقه إيجابيه لبعض ومهونين على بعض الغربه
وكلهم اصدقائى من قبل أن نعمل فى هذا المسلسل
مى كساب كانت بتطبخ لنا فى لبنان ولمه شملنا
حدثينا عن مى كساب داخل الكواليس؟
الفنانة مى كساب جايبه معاها بوتاجاز أربع عيون وفرن وبهاراتها وعيش بلدى لأنه لا يوجد عيش بلدى فى لبنان ومعاها ورق المحشى كل يوم تطبخ لنا ولمانا ولمه شملنا ومهونه علينا الغربه ومأكلانا أكل مصرى بيتى
هل خرجتى من المسلسل بأصدقاء؟
اكثر اللى فى العمل اصدقائى يعنى أنا ومؤمن نور وزينب العبد دى انتتيمتى ومحمد محسن ومحمد حنتيره اللى هو عادل يوسف واستاذ احمد السقا فيه علاقه عائليه بينى وبينه عرفنى وأنا طفله صغيره والفنان باسم السمره صديقى جدا مى كساب اختى وصاحبتى من زمان الفنان طارق صديقى العزيز والفنانة لبنى بعتبرها أمى مصطفى أبو سريع يعنى الأغلبيه اصدقائى وأول مره أتقابل مع هدى الأتربى بقت حبيبتى وبحبها جدا وممثله جميله وروحها جميله والسفر بيبين البنى ادمين حقيقى طاقتها كانت جميله جدا والفنانة سيف النصر كنا أول مره نتقابل كانت أم حنونه لينا ومهونه علينا الغربه بحنانها وكنت أول مره اشتغل مع الفنانة زينه كانت مبهجه جدا ونهى عابدين اختى وصاحبتى من زمان والسفر بيقرب وكلنا خرجنا من المسلسل بنحب بعض الفنان باسم من يومين كان عامل لنا كلنا عزومه فكلنا بالفعل عائلة والجزء الثانى ان شاء الله هيبقى أجمل لأن الحب والشغف اللى عندنا والنجاح والمخرج احمد خالد موسى بيعمل طاقه ايجابيه مخرج محترم هادى
هناك الكثيرون على السوشيال ميديا يشبهونك بالفنانه الراحله مديحه كامل هل يسعدك هذا التشبيه؟
ده شرف ليا وطبعا يسعدنى جدا لأنها جميلة الجميلات وأحلى ما أنجبت السينما المصريه من جمال وروعه فى الأداء وتمثيل ونجوميه أنا أكون إيه جنبها لكن أكيد حاجه بتسعدنى.
تعلمت من محمود ياسين الإلتزام والتواضع
زوج خالتك هو الفنان الراحل محمود ياسين ماذا تعلمتى منه فى الحياه الفنيه؟
اتعلمت منه الإلتزام التواضع انى أدخل اللوكيشن أسلم على أصغر واحد وأكبر واحد أتعامل مع عامل النظافه زى ما بتعامل مع منتج العمل كل الناس سواسيه وكل الناس اتعامل معاهم بحب وعطاء وأكون طول الوقت مبتسمه وبشوشه وطول الوقت يبقى عندى استعداد أتكلم مع الناس واتصور معاهم وأرحب بيهم لأنهم ملهمش ذنب لو أنا تعبانه أو مضغوطه أو مرهقه ومش قادره دلوقتي لأن الفنان الجمهور هو اللى صنعه يعنى الجمهور له كل حاجه أنا اتعلمت منه أهم حاجه التواضع ولم المعلومات أنى اكون طول وأنا بكبر اتعلم واسمع معلومات جديده اتفرج على أخبار أكتسب حاجات جديده علمنا الثقافة والقراءه وان لو اتنين بيتكلموا جنبى فى موضوع عام أسمع وأكيد هكتسب خبره وحاجه تنفعنى فى الحياه وشغلى لأنى ممثله.
ألم تشعرى إنك مظلومه فنيا؟
مش عارفه الحاجات دى ربنا له ترتيبه وتوفيق من عند ربنا أكيد أحيانا بيعدى عليا وقت بحس بالظلم بحس باليأس أحس انى استحق حاجات لكن بعدها بتحصل حاجات كويسه أنا كده كده عندى رضا غير طبيعى وأكيد كل حاجه لها ميعادها ووقتها أحيانا فيه شغل بكون ماضيه شغل وقبلها اتغير فأكيد بشعر بالظلم وممكن أذكر الأعمال عادى ومن ضمنها حلوه الدنيا سكر اتغيرت قبل التصوير بثلاثة ساعات واستبدلونى بممثله ثانيه وأنا اتربيت من أبويا إن عندى كبرياء ولم أوافق انهم يعوضونى ماديا مع انى كنت ماضيه ففى هذه اللحظه كنت عاوزه أسيب فيها التمثيل وفكرت حقيقى وشعرت انه مستهان بيا وإن الحركه ضيقتنى وأثرت عليا جدا وشعرت بظلم كبير وحاجات تانيه كتير لكن دى من الحاجات الكبيره اللى أثرت عليا
والدك مهندس الديكور الراحل بدر تيسير ووالدتك المذيعه نانو حمدى ما الذى تعلمتيه من الأب والأم؟
اتعلمت من بابى حاجه مهمه جدا وهى الكرامه وعزة النفس بابى جميل جداً عمره ما كان بيطلب حاجه من حد أو ينزل من نفسه عشان يوصل لحاجه علمنى أن أكون عزيزة النفس وإن عينى تكون مليانه أهم حاجه الكرامه والكبرياء وانى أتحمل المسئوليه وأعتمد على نفسى مامتى كانت معودانى وأنا صغيره انى أعتمد على نفسى حتى لو أهلى عايشين فى مستوى كويس لازم أكون عصاميه وابتدى من الأول وأدخل المعهد وأجتهد وأسعى ودى حاجه اتعلمتها منهم بشكرهم عليها حقيقى لأن مامتى كانت عايشه عيشه وكويسه لكن وهى فى الجامعه كانت بتروح اليونان تبيع تذاكر فى سينما فكرة إننا نتعود على نفسنا كلنا اتعودنا واتربينا حتى محمود وعمر أولاد رانيا وعمرو وأختى وحتى أولادهم لازم نشتغل واحنا صغيرين ونسعى احنا بإيدينا
ألم تفكرى فى بداياتك أن تكونى مذيعه مثل والدتك وأختك مريم؟
لا مفكرتش أن اكون مذيعه خالص مريم مذيعه جميله واتعرض عليها كتير تمثل وأنا اتعرض عليا أبقى مذيعه ولا زلت بيعرض عليا ولسه امبارح كان معروض عليا عرض ورفضت أنا ممكن أعمل برنامج موسم أجيب أصحابى نتكلم عادى مع منه الفنانه مش منه المذيعه.
هل هناك فنانه راحله تتمنى أن تجسدى سيرتها على الشاشه؟
أنا لم أميل الى فكرة السير الذاتيه ولكن لو هناك حاجه مع مخرج كبير وأمين وتخرج بشكل كويس على حسب تناولها يبقى ازاى.
هل تتواصلين مع جمهورك على صفحتك الشخصيه؟
لو فيه هناك صفحات اللى على الفيس بوك وكاتبين عنى حاجه بدخل أعلق بكتب لهم شكرا ناس بتمدح وتشكر فى موهبتى ودورى وأعمالى وبينبهوا الناس فى الشغلانه انهم ينتبهوا لى أكثر فأكيد ممتنه لهم جدا وزى ما قلت لك استاذ محمود علمنى وكل العيله عندنا كده من أصغر واحد لأكبر واحد احنا اتربينا على كده فبيجرى فى دمنا وبيتوارثه أولادنا
ما هو أغرب تعليق من متابعينك أثار دهشتك؟
أكثر حاجه استغربت لها حرام عليكم انتوا ليه مش بتخلوها تشتغل كتير لقيت الصيغه دى فى صفح كتير ونقاد بتقولوا حاجه اتفق عليها الجمهور والنقاد والصناع فكنت مستغربه ان اتعمل اسبوت على الموضوع ده ودى حاجه بتاعه ربنا وإن ربنا لم بيحب شخص بيحبب فيه خلقه وأنا بشكر ربنا عليه لأن قليل لو لقيت شخص أكثر الناس بتحبه وقليل أوى لو لقيت كومنت سلبى الحمد لله
من الفنان والفنانه التى تتمنى العمل معهم؟
أتمنى أن أشتغل مع ناس كتير ومع محمد ممدوح أوى تايسون وأستاذ هانى خليفه كمخرج وأستاذه كامله أبو ذكرى نفسى أشتغل مع منه شلبى وكريم عبد العزيز نفسى أشتغل مع محمد فراج تانى اشتغلت معاه لكن مشبعتش وريهام عبد الغفور وحنان مطاوع اشتغلت معاهم لكن اتمنى اشتغل معاهم وحشنى الشغل معاهم تانى
من هم أصدقائك من الوسط الفنى؟
زينب العبد قطه دى صاحبة العمر وصديقتى، حسنى شتا، محمد عز، مؤمن نور، نهى عابدين، مى كساب، مصطفى منصور وهؤلاء أقرب الناس وفيه مؤلفين اصحابى زى أيمن سليم استاذه لبنى ونس أنا زى بنتها لكن هى صديقتى جدا
هل تؤمنى بالسينما النظيفه؟
أه بؤمن بالسينما النظيفه طبعا احنا ممكن نعمل كل الشخصيات ونوصل كل حاجه بدون فجاجه وابتذال مبحبوش بصراحه وكل واحد حر فى رأيه
هل تعتقدين إن الدراما تترك أثر من خلال المشاهد؟
طبعا الفن عما مؤثر وفعال لى لكن لسه مفتحتش حاجه أحمد خالد نصحنى أتأنى وفيه حاجه كمان عاوزه اقولها اقول عجبني الاسئله بتاعتك انها مختلفه عن الاسئله اللي انا بجاوبها
