مصر ..تحرك برلماني بعد أنباء زيادة سنين التعليم الإلزامي

أعلن النائب فريدي البياضي، تقدمه بطلب إحاطة لرئيس الحكومة ولوزير التربية والتعليم، من أجل فهم التوجه الحكومي بعد الحديث عن زيادة سنين التعليم الإلزامي من 12 لـ 13 سنة، عن طريق إدخال رياض الأطفال ضمن التعليم الإلزامي بداية من 2028 أو 2029. 

وقال النائب: “سؤالي واضح وبسيط: على أي أساس اتاخد القرار ده؟، هل في دراسات علمية؟ هل في حساب للتكلفة؟ وهل مدارسنا جاهزة؟”. 

وتابع: “الوزير قال إن التطبيق في أول سنة هيخلّي دفعتين يدخلوا مع بعض، يعني عدد الطلاب الجدد هيقفز من حوالي مليون ونص لـ قريب من 3 ملايين طالب مرة واحدة، رقم كبير جدًا، وبيخلّي أي حد يسأل: المدارس هتستوعب ده إزاي؟”. 

وأضاف: صحيح الدولة عملت مجهود كبير وبنت حوالي 150 ألف فصل جديد في السنين اللي فاتت، وده تقريبًا ثلث فصول مصر، بس الحقيقة إن الكثافات لسه عالية، والمدارس شغالة على آخرها، الموضوع كمان مش مباني بس، عندنا عجز في المدرسين، ومشاكل في انتظام الحضور في الإعدادي والثانوي، ومستوى التعليم مش واحد في كل حتة”. 

وقال النائب: “لو بصّينا برّه، هنلاقي إن دول متقدمة في التعليم زي فنلندا والدنمارك التعليم الإلزامي عندهم 10 سنين بس، وفرنسا 10 سنين، وألمانيا من 10 لـ 12 سنة حسب الولاية، الدول دي ما طوّرتش تعليمها بزيادة السنين، طوّرته بالاهتمام بالمدرس، وتقليل عدد الطلبة في الفصل، واستقرار السياسات، كمان لازم نسأل عن الفلوس، سنة إلزامية زيادة معناها مصاريف أكتر، في وقت لسه محتاجين نحسّن مرتبات المدرسين، ونصلّح مدارس، ونطوّر مناهج”. 

وأضاف: “علشان كده طلبت إن وزير التعليم ييجي قدّام لجنة التعليم في مجلس النواب، ويشرح لنا الرؤية كاملة، والدراسات اللي القرار مبني عليها، وخطة التنفيذ، وضمانات إن الخطوة دي فعلاً تحسّن التعليم مش تزود الحمل على المنظومة، التعليم مش بعدد السنين… التعليم بجودته”.