دخلنا غرفة الخزينة، فوجدنا عم “سيد” قاعد على الأرض، قدامه ورقة وقلم وآلة حاسبة قديمة زرارها واقع.
عم سيد تاجر صغير، فاتح محل قطع غيار طول عمره بيصحى الفجر، يقفل بعد العشاء لا عمره سافر باريس، ولا اشترى ساعة رولكس.
النهاردة قاعد بيحسب
“بص يا بيه”، قال وهو بيقلب في الورقة، “أنا الشهر اللي فات بايع بـ 100 ألف.
رحت أشتري بضاعة جديدة لقيتها بـ 95 ألف طب إيجار 5، وكهربا 2، ومصاريف البيت 10
يبقى أنا اشتغلت شهر كامل عشان أخسر 12 ألف.
إزاي؟”
ضحك ضحكة مرة “أنا حاسس إني ساكن في بيت مليان خير، تلاجة مليانة، بس كل ما آجي أفتح الخزنة أدفع، ألاقيها فاضية.”
عم سيد مش لوحده كلنا عم سيد.
السؤال المحوري لو مصر بيت مليان خير.. نيل وأرض وغاز وقناه وآثار أكثر من نصف آثار العالم وناس مضيافه و شقيانة، ليه الخزنة دايماً فاضية؟
ليه بقا ونبدأ بحكاية الدولار والديون
بتبيع عفش البيت عشان تدفع الإيجار إحنا بنستورد أكتر ما بنصدر قمح وزيت وعلف وموبايلات، كله بالدولار ولما الدولار يغلى، العدوى بتتنقل مسمار يغلى فكرسي يغلى فالموظف مش عارف يشتري.
نجيب دولار منين؟
قناة السويس والسياحة وتحويلات ولادنا برا والثلاثة متقلبين.
فلما الحنفية تضعف، نستلف والاستلاف شكله حلو في الأول، بيسد الخرم بس بعد شوية، بنستلف عشان نسدد فوايد السلف اللي فات بقينا بنبيع عفش البيت عشان ندفع الإيجار.
لما ربع ميزانيتك رايح فوايد ديون، يبقى أنت بتدفع تمن الماضي مش بتبني مستقبل.
حكاية الدعم والخرم اللي من تحت بنملى البانيو وهو مفتوح
فكرة الدعم نبيلة نشيل عن الغلبان بس اللي حصل إن الدعم بقى بانيو مخروم بنملى ميه من فوق والميه بتنزل من تحت.
بنزين مدعوم بيمون مرسيدس زي ما بيمون توك توك.
عيش مدعوم بياكله اللي قادر يشتري جاتوه.
والأدهى، الاقتصاد الموازي ملايين بيشتغلوا برا الدفاتر لا ضرايب ولا تأمين مش لأنه حرامي، لأنه خايف من الروتين.
فالنتيجة الدولة شايلة حمل 115 مليون وبتحاسب 10 مليون بس.
كأنك فاتح عزومة لـ 115 وبتطلب من 10 يدفعوا طبيعي الخزنة تفضى.
أزمة إدارة مش أزمة موارد
احنا مش فقرا عندك 115 مليون، 60% شباب ده كنز عندك نيل وبحرين وشمس تكفي قارة وغاز وآثار.
أمال فين المشكلة؟
الخير متبعثر الفلاح يرمي نص محصوله عشان مفيش تلاجة.
الصياد يرمي السمك عشان مفيش مصنع تعليب الشاب يعمل أبلكيشن ويسافر بيه دبي عشان هنا مفيش تمويل.
احنا بنصدر المادة الخام برخص التراب ونستوردها منتج نهائي بنصدر قطن ونستورد قميص بنصدر رمل ونستورد زجاج.
كأن عندك مطبخ مليان خضار ولحم ودجاج وكل يوم تطلب دليفري لأنك مكسل تطبخ.
مفتاح الغرفة 3 حلول عملية
بطّل تبيع أخضر.. بيع مستوي أي حاجة بنستوردها ونعرف نعملها في مصرنا الحبيبه لازم نعملها كل مصنع صغير هو حنفية دولار بتتقفل.
خلي عم سيد يبقى مصنع صغير مش مجرد مستورد.
- دخّل اللي في الضلمة للنور.. بالحنية مش بالعصاية فالاقتصاد الموازي ابنك اللي هربان طمنه نظام ضريبي مبسط مقطوع، 1000 جنيه وخلاص، لا دفاتر ولا محاسب.
- تأمين صحي لو دخل المنظومة لما 20 مليون يدخلوا النور، الخزنة هتفيض.
دعم يوصل لصاحبه.. بالاسم كفاية دعم سلعة، عايزين دعم بني آدم بدل ما أدعم الرغيف فياكله المليونير، أدي تمنه كاش في إيد اللي يستحقه.
الكارت الذكي موجود والداتا موجودة.
غرفة الخزينة مش محتاجة ساحر، محتاجة محاسب شاطر يقفل الحنفيات اللي بتسرب ويفتح الشبابيك التي تدخل الشمس .
