أمل رمزي تكتب: خليك طيب.. بس مش ساذج
أصعب صراع ممكن تعيشه إنك تكون شخص طيب في عالم مصمم كل يوم إنه يختبر طيبتك.
بتختار كلامك.
بتعدي.
بتسامح.
بتدي فرصة تانية.
بتراعي ظروف الناس،
وبتطبطب على نفسك وتقول: أنا مش عايز أبقى سبب وجع لحد.
لكن الحياة بتاخد الحتة دي منك بالتقسيط.
واحد يستغل طيبتك.
واحد يفسر احترامك على إنه ضعف.
واحد ياخد مساحتك كلها لأنك كل مرة كنت بتقول:
معلش، مش مستاهلة.
لحد ما فجأة تخاف من نسخة بدأت تطلع منك وقت الغضب.
نسخة مش فارق معاها حاجة.
عايزة تقول: خلاص، من هنا ورايح أنا هبقى زيهم.
وتبدأ الصراع الحقيقي.
إنت مش بتحارب الناس بس.. إنت بتحارب فكرة. بتسأل: ليه أراعي حد عمره ما راعاني؟ ليه أدي فرصة وأنا اللي بدفع تمنها كل مرة؟ ليه أكون الأهدى والأعقل والأرحم، وأنا شايف ناس بتاخد كل اللي عايزاه بالقسوة؟
فتفتكر إن الحل إنك تطلع أسوأ نسخة منك. مش لأنك بتحب الشر.. لكن لأنك تعبت من الحراسة على الخير اللي جواك.
بس لازم تفهم:
الطيبة مش إنك تسمح للناس تأذيك.
والرحمة مش إنك تلغي حدودك.
والتسامح مش إنك تدي نفس الشخص مفتاح نفس الباب كل مرة.
ينفع تكون طيب.. وتقول لا.
ينفع تحب.. وتبعد.
ينفع تسامح.. ومتديش فرصة تانية.
ينفع تتمنى الخير لشخص.. وإنت رافض تمامًا إنه يبقى جزء من حياتك تاني.
دي مش قسوة. دي طيبة نضجت.
وأهم حاجة ممكن تحصلك مش إن الناس تخليك شرير.
الأسوأ إنهم يقنعوك إنك لازم تتخلى عن الجزء النضيف اللي فيك علشان تعرف تعيش.
خليك طيب.. بس مش ساذج.
خليك رحيم.. بس مش متاح للكل.
خليك إنسان.. بس اتعلم إن اللي بيحافظ على سلامه مش لازم يكسر غيره عشان ينجو.
إنت مش محتاج تطلع أسوأ نسخة منك.
إنت محتاج تبني نسخة أقوى من الطيبة القديمة.
طيبة بتعرف تقول لا.
قلب بيعرف يقفل بابه وقت اللزوم.
وعقل بيعرف إن بعض الناس لا يحتاجون منك انتقامًا..
بل يحتاجون فقط ألا يجدوا طريقًا إليك مرة أخرى.
كلمات ومعاني راقت لي
